රූකාන්ත-චන්ද්රලේඛා යුවළ ජනපතිගෙන් ඉල්ලති
ප්රවීණ ගායන ශිල්පීන් වන රූකාන්ත සහ චන්ද්රලේඛා යුවළට හිරිහැර කිරීමේ සිද්ධිය සම්බන්ධයෙන් බන්ධනාගාර ගතව සිටින පුද්ගලයන්ට සමාව දෙන ලෙස එම ගායක යුවළ ජනාධිපති මහින්ද රාජපක්ෂ මහතාගෙන් ලිඛිතව ඉල්ලීමක් කරයි.
රූකාන්ත ගුණතිලක මහතාගේ සහ චන්ද්රලේඛා පෙරේරා මහත්මියගේ අත්සනින් යුතු එම ලිපිය අරලියගහ මන්දිරයේ දී ඊයේ (14) පස්වරුවේ ජනාධිපති මහින්ද රාජපක්ෂ මහතා වෙත බාර දුන්නේය.අදාළ සිද්ධිය සම්බන්ධයෙන් බන්ධනාගාරගතව සිටින පුද්ගලයන්ගේ පවුල් සහ ඔවුන්ගේ ඥාතීන් පිළිබඳ සානුකම්පිතව සිතා රූකාන්ත සහ චන්ද්රලේඛා යුවළ මෙවැනි තීරණයකට පැමිණ තිබේ.
දේශපාලන වේදිකාවක දී ගීත ගායනා කිරීම හේතුවෙන් පසුගිය 2000 වසරේ ජනවාරි මස 26 දා ඔවුන් වෙත මැර ප්රහාරයක් එල්ල කිරීම, නිවෙසේ තිබූ රන් ආභරණ සහ ජීප් රථය කොල්ල කෑම ආදිය සම්බන්ධයෙන් අධි චෝදනා ලැබ සිටි ජනාධිපති ආරක්ෂක අංශයේ සාමාජිකයන් 10 ට පානදුර පළාත්බඳ මහාධිකරණය මඟින් බරපතල වැඩ සහිතව සිර දඬුවම් නියම කෙරිණි. අධිකරණ තීන්දුවට ගරුකරන අතර එයින් සිතට සතුටකට වඩා සැනසීමක් ලැබුණ බව ද අධිකරණයෙන් දඩුවම් ලැබුණු පුද්ගලයන් හට තමන්ගේ හදවතින්ම සමාව ලබාදෙන බවද මේ ගායන යුවළ කොළඹ දී පැවැති මාධ්ය හමුවක දී ප්රකාශ කළහ.
