මවක් දූෂණය කර නිවස කොල්ලකෑ යුද හමුදා සෙබලු

අනුරාධපුර, හොරොව්පතාන, නබඩවැව, පරංගියාවාඩිය ප්‍රදේශයේ පිහිටි නිවසකට කඩා වැදී නිවසේ සිටි දාහතර හැවිරිදි පාසල් සිසුවා අතපය බැඳ කාමරයකට දමා එම සිසුවාගේ මව දූෂණය කර නිවස කොල්ලකා පළා ගිය යුද හමුදා සෙබලු සිව් දෙනෙක් අද (27)අනුරාධපුර මහජන ක්‍රිඩාංගනයේදී අත්අඩංගුවට ගෙන තිබේ.

 යුද හමුදාවේ ලාන්ස් කෝප්‍රල්වරයක් සහ සාමාන්‍ය සෙබලු තුන් දෙනෙක් සිද්ධිය සම්බන්ධයෙන් අත්අඩංගුවට ගෙන ඇත. අනුරාධපුර, නොච්චියාගම, ළඳවැව පිහිටි ශ්‍රි ලංකා ජාතික ආරක්ෂක බලමුළුවට අනුයුක්තව මොවුන් සේවය කරමින් සිට ඇත. දූෂණයට ලක්වූ කාන්තාවගේ සැමියාද හමුදා සේවයේ නිරතව සිටී. කාන්තාව මුදල් පොලියට ලබා දීමේ ව්‍යාපාරයක් පවත්වා ගෙන ගොස් තිබේ. 08.08.2013 දින රාත්‍රි 11.30 ට පමණ යතුරුපැදිවලින් එම නිවසට කඩා වැදුණු මෙම හමුදා කොල්ලකරුවන් හතර දෙනා නිවසේ ඉදිරිපස දොර කඩා ඇතුළු වී දරුවාගේ අතපය බැඳ කාමරයකට දමා වසා කාන්තාව හතර දෙනා විසින්ම දූෂණය කර ඇත.

 අනතුරුව රුපියල් තිස්පන්දහසක මුදලක්ද, කරාබු, මුදු, ජංගම දුරකතන දෙකක්, විදුලි පන්දමක්ද කොල්කා ගෙන පළාගොස් තිබේ. කොල්ලකන ලද ජංගම දුරකථන ඔස්සේ කෙරුණු විමර්ශනයකදී සැකකරුවන් සම්බන්ධයෙන් ලද හෝඩුවාවක් ඔස්සේ පරීක්ෂණ පවත්වා සැකකරුවන් කොටුකර ගන්නට හැකිවූ බව පොලිසිය සඳහන් කරයි. හමුදා සෙබලු මෙම කොල්ලයට ගොස් ඇත්තේ රාජකාරියේ නිරතව සිටියදී බව අනාවරණය වී තිබේ.

දෙවැනි දරුවා බලාපොරොත්තුවෙන් ලසිත් මාලිංග චැම්පියන්ස් ලීග් අතහරී

පුද්ගලික ෙහ්තුන් මත ලසිත් මාලිංග ඉන්දියාවේ පැවැත්වෙන චැම්පියන්ස් ලීග් තරගාවලියට සහභාගී නොවීමට තීරණය කර ඇත. එසේම ඔහු සිම්බාබ්වේහී පැවැත්වෙන ක්‍රිකට් තරගාවලිය සදහාද ශ්‍රී ලංකාව නියෝජනය නොවේ. ඔහු අදාළ සමයේදී ක්‍රීඩා නොකිරීමට ක්‍රීකට් ආයතනයෙන් ඉල්ලීමක් කර ඇති අතර ඊට ක්‍රීකට් ආයතනයේ අවසරය මේවනතෙක් හිමිව නැත. 

ඊට හේතුවී ඇත්තේ ජාතික ක්‍රිකට් ‍තේරීම් කමිටු සභාපතිවරයාවන සනත් ජයසූරිය හා ඒ සම්බන්ධයෙන් සාකච්ඡා කලයුතුව ඇති හෙයින්. මේ දිනවල ක්‍රීඩකයන් රටින් බැහැරව සිටීම මෙන්ම සනත් ජයසූරියද රටින් බැහැරව සිටී. මාලිංග හා බිරිද ටාන්යා ඔවුන්ගේ දෙවැනි දරුවා බලාපොරොත්තුවෙන් පසුවීම මෙසේ ක්‍රීඩා පිටියෙන් ඉවත්ව සිටීමට හේතුව වී තිබේ. 

ක්‍රිකට් ආයතන ආරංචි මාර්ග පවසන්නේ පුද්ගලික හේතුවක් වීම හේතුවෙන් මාලිංගගේ ඉල්ලීම ප්‍රතික්ෂේප කිරීමට කිසිදු හේතුවක් නොමැති බවයි. ලසිත් මාංලිග හට ඔහුගේ ඉන්දීය ප්‍රිමියර් ලීග් කණ්ඩායම වන මුම්බායි ඉන්දියන් කණ්ඩායමේ අවසරය මේ සදහා හිමිව තිබෙනවා. 

සනත් ලැබූ තාවකාලික පැවිද්දට සංඝ විරෝධය

ප්‍රවීණ සිනමා නළු සනත් ගුණතිලක මහතා සතියක පමණ කාලයක් පැවිද්දත්වයට පත් කරවීම සම්බන්ධයෙන් ආගමික සංවිධානවල නායක හිමිවරු දැඩි විරෝධය පළ කරති. එම ක්‍රියාවෙන් ගැටලුවක් හෝ ශාසනයට හානියක් සිදු නොවන බවට තවත් හිමිවරු මත පළ කරති.

 නළු සනත් ගුණතිලක මහතා මාධ්‍ය වෙත පවසා ඇත්තේ පැවිදි දිවියේ ඇති වටිනාකම පිළිබඳ අවබෝධ කර ගැනීම සඳහාත් ඉදිරියේදී රූපගත කිරීමට නියමිත විත්‍රපටයක පැවිදි චරිතයක ස්වභාවය සම්බන්ධව පූර්ව අත්දැකීමක්, පුහුණුවක් ලබා ගැනීම සඳහාත් තමා සතියක පමණ කාලයක් පැවිදි දිවියට ඇතුළු වූ බවයි.

මේ පිළිබඳ කළ විමසීමකදි ජාතික හෙළ උරුමයේ නායක ආචාර්ය ඕමල්පේ සෝහිත හිමියන් දැඩි විරෝධත්වයක් පළකරමින් ප්‍රකාශ කළේ මෙවැනි අදහසකි. සනත් ගුණතිලක මහත්තයා හෝ වේවා මොන කවුරු හෝ වේවා තමන්ගේ රස්සාව රඟපෑම සඳහා සුදුසුකම් ලබා ගැනීමට ශාසනයට ඇතුළත්වන්න පැවිදි වූවා නම් එය ශාසනයේ ගෞරවය කෙලසීමක්. පැවිදි වීමේදි ආරාමික ශාසනික සම්ප්‍රදාය අනුගමනය කිරීමක් සිදුවෙලා නැහැ.

ලංකාවේ ප්‍රථම වරට බලු කසාදයක්‌

ශ්‍රී ලංකා පොලිස්‌ ඉතිහාසයේ ප්‍රථම වරට ඉතාමත් අපූරු විවාහ මංගල්‍යයක්‌ මහනුවර පොලිස්‌ ක්‍රීඩාපිටියේදී ඊයේ (26 වැනිදා) පෙරවරුවේ සිදුවිය.

එම විවාහ මංගල්‍යය පොලිස්‌ නිළ සුනඛ අංශයේ පිරිමි සතුන් හා ගැහැණු සතුන් අතර සිදුවූ විරල විවාහයකි. විවාහ පත්වූ යුවල දහයකි. යුවල දහයම විදේශයේ උපත ලැබුවෝය. මහනුවර පොලිස්‌ නිළ සුනඛ අංශයේ පොලිස්‌ සේවය සඳහා පුහුණු කරනු ලැබුවෝය.

මංගල ඇඳුම් ආයිත්තමින් සරසන ලද නිළ සුනඛ යුවල ලියාපදිංචිය ජ්‍යෙෂ්ඨ නියෝජ්‍ය පොලිස්‌පති එච්. එන්. බී. අඹන්වල මහතා සහ පේරාදෙණිය විශ්වවිද්‍යාලයේ පශු වෛද්‍ය අංශයේ මහාචාර්ය ඉන්ද්‍රdනි ද සිල්වා මහත්මිය අතින් සිදුවිය.ජ්‍යෙෂ්ඨ නියෝජ්‍ය පොලිස්‌පති එච්. එන්. බී. අඹන්වල මහතාගේ සංකල්පයක්‌ වූ මෙම ව්‍යාපෘතිය සඳහා පොලිස්‌පති එන්. කේ. ඉලංගකෝන් මහතාගේ පූර්ණ අනුමැතිය ලැබී ඇත.

කම් සැප අත්හල සනත් පැවිදි බිමට

ප්‍රවීණ සිනමා නළු සනත් ගුණතිලක මහතා පසුගිය බ්‍රහස්පතින්දා (22) හඟුරන්කෙත විමලරතන යන නමින් බෙන්තර සපුගොඩ ශ්‍රී මහා විහාරයේදී පැවිදි දිවියට ඇතුළත් වී තිබේ.

අගෝස්තු 22 වැනිදා පෙරවරු 7.22 ට යෙදුණු සුභ මොහොතින් පැවිදි දිවියට ඇතුළත් වූ විමලරතන හිමියන්ගේ උපාධ්‍යායවරුන් ලෙස කටයුතු කර ඇත්තේ කෝට්ටේ ශ්‍රී කල්‍යාණි සාමග්‍රී ධර්ම මහා සංඝ සභාවේ වැඩබලන මහා නායක හා දක්ෂිණ පාර්ශ්වයේ උප සභාපති ආචාර්ය ඉත්තෑපානේ ධම්මාලංකාර නාහිමි ප්‍රමුඛ එම සංඝ සභාවේ බෙන්තර විහාර පාර්ශ්වයේ ප්‍රධාන සංඝනායක හා විනිශ්චය කාරක සභාවේ ‍ලේකම් ශාස්ත්‍රපති දෙදදියවල තිලකසිරි හා එම සංඝ සභාවේම කාරක සභාවේම කාරක සභික නුගේගොඩ නාලන්දාරාමාධිපති තීනියාවල පාලිත හිමිවරුන්ය.

මෙසේ පැවිදි දිවියට ඇතුළත් වූ විමලරතන හිමිපාණෝ සියලු වත් පිළිවෙත් පුරමින් සතියක කාලයක් තාවකාලික පැවිදි දිවියක් ගත කිරීමෙන් අනතුරුව අගෝස්තු 29දා බ්‍රහස්පතින්ද ධර්මානුකූලවම එම පැවිදි කාලය අවසන් කිරීමට නියමිතව සිටිති.

බොදුබල සේනාවෙන් බැසිල් රාජපක්ෂට අභියෝගයක්

'හලාල් සහතිකය' ඉවත් කරන බවට ආණ්ඩුව ප්‍රකාශ කලද, එය මෙතෙක් ක්‍රියාත්මක වී නැතැයි චෝදනා කල බොදු බල සේනා සංවිධානයේ ලේකම් ඥානසාර හිමියන්, ඒ සම්බන්ධයෙන් බැසිල් රාජපක්ෂ අමාත්‍යවරයා බෞද්ධ ප්‍රජාවට පැහැදිලි පිළිතුරක් දිය යුතු බව අවධාරණය කළහ. අද ගාල්ලේ පැවති බොදු බල සේනා සමුළුවේදී උන්වහන්සේ එම කාරණා සඳහන් කළහ. 'හලාල් සහතිකය' හඳුන්වාදීමේදී බැසිල් රාජපක්ෂ අමාත්‍යවරයා විශාල කාර්ය භාරයක් ඉටු කල බව මුස්ලිම් නායකයින් තමන් වහන්සේට පවසා ඇති බවද උන්වහන්සේ එහිදී පැවසුහ.

 බොදු බල සේනාවට එරෙහිව මේවනවිට මාධ්‍ය වාරණ ක්‍රියාත්මක වන බව පැවසු උන්වහන්සේ, ඒ සඳහා බලපෑම් කරනන් අතර බැසිල් රාජපක්ෂ අමාත්‍යවරයා ඉදිරියෙන්ම සිටින බව අනාවරණය වී ඇතැයි ද පැවසුහ. 

 රටේ නැගී එන සිංහල- බෞද්ධ බලවේගය දුර්වල කිරීම සඳහා විමල් විරවංශ ඇමතිවරයා, 'රාවනා බලකායත් ගොඩනගා ඇති බවත්, ඔහුගේ අමාත්‍යංශයෙන් වැටුප් ගෙවන කාර්ය මණ්ඩලයක් සහිත 'ලංකා සි නිව්ස්' වෙබ් අඩවිය හරහා බොදු බලසේනාවට එරෙහි අමුලික බොරු බේගල් පලකරන බවත් ඥානසාර හිමියන් වැඩිදුරටත් පැවසුහ.

''ලංකාවට ආවේ විවේචනය කරන්න නොවේ'' - එක්සත් ජාතීන්ගේ මහ කොමසාරිස්වරිය

තමා පැමිණියේ ශ්‍රී ලංකාව විවේචනය කිරීමට නොව, රටේදී ජාත්‍යන්තර මානව හිමිකම් උල්ලංඝනයක් සිදු වේ නම් ඒ පිලිබඳව අවධානය පළ කිරීමට බව මානව හිමිකම් පිලිබඳ එක්සත් ජාතීන්ගේ මහ කොමසාරිස්වරිය පවසයි. නවී පිල්ලේ ඒ බව කියා සිටියේ, ශ්‍රී ලංකාවේ ඇගේ කාර්යභාරයට එරෙහිව එල්ල වන විවේචන බීබීසීයේ කොළඹ වාර්තාකරු අසාම් අමීන් විසින් ඇය වෙත යොමු කරන ලද අවස්ථාවේය.

 අද ශ්‍රී ලංකාවට ලඟා වූ මහ කොමසාරිස්වරිය කොළඹ සිනමන් ග්‍රෑන්ඩ් හෝටලයේදී එක්සත් ජාතීන්ගේ කාර්ය මණ්ඩලය හමුවීමට පෙර මඳ වේලාවකට මාධ්‍යවේදීන් හමුවූවාය.

 "ශ්‍රී ලංකාව ඇතුළු, මුළු ලෝකෙම ආණ්ඩු විසින් එකඟවෙලා සකස් කරලා තියෙන මානව හිමිකම් ප්‍රමිතීන්ට අනුකූලවයි, මගේ නිරීක්ෂණය සිද්ද වෙන්නේ. මම මගේම නීති හදා ගෙන නැහැ," යනුවෙන් ද ඇය සඳහන් කළාය.

 ශ්‍රී ලංකාවේ සංචාරයක යෙදෙන මෙන් මීට පෙර ආණ්ඩුව තමන්ට ආරාධනා කළ නමුත්, උගත් පාඩම් කොමිසමේ වාර්තාව නිකුත් වන තුරු එම සංචාරය පමා කිරීමට තමන් තීරණය කළ බව ද ඇය සඳහන් කළාය. 

 මේ අතර ශ්‍රී ලංකාවේ යුද්ධයේ අවසාන අදියරේදී සිදුවූ අපරාධ සියැසින් දුටු අය රහසිගත කඳවුරු වල සිටිය හැකි බව අතුරුදහන් වූවන් සොයා බැලීම සඳහා වන කමිටුව ප්‍රකාශ කරයි. ඒ කඳවුරුවලට යාමේ ඉඩක් ලබා ගත හැකි වෙතොත් මහ කොමසාරිස් වරියට තොරතුරු හෙළි කර ගැනීමේ අවස්ථාවක් උදාවනු ඇති බව කමිටුවේ ප්‍රධාන ලේකම් සුන්දරම් මහේන්ද්‍රන් කියා සිටියේය.

 -බිබිසි සංදේශය

CPL ශූරතාව සංගක්කාරලාගේ ජැමෙයිකා තලවාස් පිලට

බටහිර ඉන්දීය කොදෙව් දුපත්හිදී පැවැති 2013 කැරිබියන් ප‍්‍රිමියර් ලීග් තරගාවලියේ (සී. පී. එල්.) ශූරතාව දිනාගැනීමට ජැමෙයිකා තලවාස් පිල ඊයේ (24 වැනිදා) සමත්විය. ටි‍්‍රනිඩෑඞ් නුවර ක්වීන්ස් පාර්ක් ඕවල් කී‍්‍රඩාංගණයේදී පැවති අවසන් මහ තරගයේදී ගයනා ඇමසන් වොරියර්ස් පිල පරදවා කඩුලූ 7 ක ජයක් ලබාගනිමින් ජැමෙයිකා තලවාස් පිල මෙම ශූරතාව දිනාගත්තේය.

 අවසන් තරගයේදී ලකුණු 129 ක ඉලක්කයක් හඹාගිය ජැමෙයිකා තලවාස් පිල ඕවර 17.3 කදී කඩුලූ 3 ක් පමණක් දැවී එම ඉලක්කය සම්පූර්ණ කළ අතර ජැමෙයිකා පිලේ වැඩිම ලකුණු ලභියාවූ කි‍්‍රස් ගේල් පන්දු 48 කදී නොදැවී ලකුණු 47 ක් රැස්කරමින් තරගයේ වීරයා සම්මානයද හිමිකරගත්තේය. ඔහුගේ ඉනිමට හතරේ පහර 6 ක් ඇතුළත්විය. ගේල්ට අගනා සහයක් දුන් ඔන්ඩි‍්‍ර රසල් වේගවත් ඉනිමක් කී‍්‍රඩා කරමින් පන්දු 18 කින් ලකුණු 33 ක් රැස්කළේ හයේ පහරක් සහ හතරේ පහර 5 ක්ද සමගිනි.

අවසන් පූර්ව තරගයේදී අර්ධ ශතකයක් ලබාගනිමින් ජැමෙයිකා තලවාස් පිලේ ජයග‍්‍රහණයේ නියමුවා බවට පත්වූ කුමාර් සංගක්කාරට මෙම තරගයේදී ලබාගත හැකිවූයේ ලකුණු 13 ක් පමණි.