සටන දිනා මං මහ ඇමැති වෙනවා - එජනිස අපේක්‍ෂක දයාසිරි ජයසේකර

පාර්ලිමේන්තුවේ සිට පළාත් සභාව තෙක්‌ ආපසු හැරුණු දයාසිරි ජයසේකර මහතාගේ නිසැක බලාපොරොත්තුව වනුයේ වයඹ මහඇමැති ධුරයයි. එහෙත් එය එතරම් ලෙහෙසි පහසු කටයුත්තක්‌ ද නොවන බව පෙනීයයි.  දයාසිරි ජයසේකර මහතා සමඟ කරන ලද සම්මුඛ සාකච්ඡාවකි මේ.

ප්‍රශ්නය - පසුගිය මහ මැතිවරණයේදී ඔබ එක්‌සත් ජාතික පක්‍ෂයේ සිට සන්ධාන ආණ්‌ඩුව විවේචනය කොට විපක්‍ෂ භූමිකාව නියෝජනය කරමින් පාර්ලිමේන්තුවට තේරී පත්වුණා. එහෙත් මෙවර පළාත් සභා මැතිවරණයේදී ඔබ සන්ධානය දිනවන්න මහ ඇමැතිධුරය ලබා ගන්න තරග කරනවා. මොනවාද ඔබට ලැබෙන ප්‍රතිචාර.

පිළිතුර - ඇත්තටම. මම ගත්තු ඒ තීරණය ගැන ජනතාවගෙන් විශාල ප්‍රතිචාරයක්‌ තිබෙනවා. මම එක්‌සත් ජාතික පක්‍ෂය පාවාදීලා පක්‍ෂයේ ඡන්ද අරගෙන ගිහිල්ලා ආණ්‌ඩු පක්‍ෂයේ වාඩිවුණේ නැහැ. ඒ වගේම විශේෂයෙන් මම පාර්ලිමේන්තු මන්ත්‍රී ධුරයෙන් ඉල්ලා අස්‌වුණා. එය මා හිතන්නේ ඓතිහාසික තීන්දුවක්‌ කියලයි. විශේෂයෙන්ම මධ්‍යස්‌ථ මතධාරීන් බොහෝ පිරිසක්‌ මට කතා කළා. ඔවුන් මගේ තීරණය අගය කළා. ඔවුන් කිව්වේ පක්‍ෂයේ රැඳී සිටින්න බැරිනම් පක්‍ෂයෙන් ඉවත්වුණාට ප්‍රශ්නයක්‌ නැහැ.

පුංචි දුව ලැබුණේ එංගලන්තයේ දී - මේධා ජයරත්න

දක්ෂ නි‍ෙව්දිකාවක හා රංගන ශිල්පිනියක ලෙස අප හඳුනාගෙන සිටි මේධා ජයරත්න පිළිබඳ කිසිදු තොරතුරක් පසුගිය කාල වකවානුවේ දැනගන්නට ලැබුණේ නැහැ. වසර කිහිපයකට පසුව නැවතත් මේධා තම රසිකයන් අතරට පැමිණ සිටිනවා. මේධා ඇගේ නවතම තොරතුරු බෙදා හදාගන්නට එක්වුණේ කලකට පසුවයි.

ඔබ හිටි හැටියේම විදේශ ගතවුණා නේද?

හිටි හැටියේම නෙමෙයි. අපි විදේශ ගත වුණේ සැලසුම් කරලයි. හුඟක් දෙනෙක් හිතන්නේ මම හදිස්සියේම රට ගියා කියලයි. එහෙම නැහැ. මොකද මගේ මහත්තයා සුරංග ලක්මාල් සෙනෙවිරත්න ගේ උපාධිය සඳහායි අපි ගියේ. ඔහු එංගලන්තයේ දී ව්‍යාපාර කළමනාකරණය පිළිබඳ හැදෑරුවා. නමුත් අපිට වීසා ලැබෙනකම් අපි මේ ගැන හරියටම ස්ථිර කරන්න බැරි නිසා කිසිවෙකුටත් කිව්වේ නැහැ. විදේශ ගත වෙන්නට දින දෙක තුනකට කලින් අපිව රිය අනතුරකට ලක්වුණා. මේ නිසා අපේ විදේශ ගතවීමට වඩා රසිකයන් කතා කළේ අපි මුහුණ දුන් රිය අනතුර පිළිබඳවයි.

ඒ රිය අනතුර කුමක් ද?

දඹුල්ලේ දී අපේ මෝටර් රථය තවත් වාහන 5 ක ගැටුණා. එයින් දෙවියන්ට පින්සිද්ධ වෙන්න අපි කාටවත් අනතුරක් වුණේ නැහැ. ඒ සිදුවීම නම් තාමත් මතක් වෙනකොට හිතට බයක් දැනෙනවා.

තැපැල් ඡන්ද අයදුම්පත් පහෙන් එකක් ප්‍රතික්ෂේප වෙලා

තැපැල් ඡන්ද අයදුම්පත් අතරින් පහෙන් එකක් ප්‍රතික්ෂේප වී ඇතැයි කැෆේ සංවිධානය පවසයි. තැපැල් ඡන්ද අයදුම් කිරීම සම්බන්ධයෙන් කැෆේ සංවිදානය නිකුත් කළ නිවේදනයක මේ බව සදහන් වෙයි.

රාජ්‍ය සේවකයින්ගෙන් 19% කට හරියට තැපැල් ඡන්ද අයදුම්පත පුරවා ගැනීමට නොහැකි වී ඇතැයි ද කැෆේ සංවිධානය කියයි. තවද අත්සන් නැති, වැරදි තොරතුරු දුන් අයදුම්පත් 13,500 ක් ඇති බවත් රාජ්‍ය සේවකයින් 8,379 ක් සිය අයදුම්පත් නිසි වේලාව තුළ භාරදී නැති බවද එම සංවිධනය පෙන්වා දෙයි.මේ ආකරයට සිය ඡන්ද අයිතිය ආරක්ෂා කර ගත නොහැකි රාජ්‍ය නිළධාරීන් ජනතාවගේ ඡන්ද අයිතිය ආරක්ෂා කරන්නේ කෙසේදැයි කැෆේ සංවිධානය විමසයි.

මෙවර පළාත් සභා මැතිවරණයේ දී තැපැල් ඡන්දය ප්‍රකාශ කිරීම සදහා අයදුම් කොට ඇති පිරිසෙන් 26,232 කගේ එනම් මුඵ අයදුම්පත් සංඛ්‍යාවෙන් 19% ක් ප්‍රතික්ෂේප වී ඇති බව එම සංවිධානය නිකුත් කල නිවේදනයක දැක්වෙයි. එම සංඛ්‍යාව සෑම තැපැල් ඡන්ද අයදුම්පත් පහක් අතුරින් එකකි. මැතිවරණ ක්‍රියාවලියේ කොදු නාරටිය බදු රාජ්‍ය සේවකයින් මෙතරම් විශාල පිරිසක ගේ අයදුම්පත් ප්‍රතික්ෂේප වීම ශ්‍රී ලංකාවේ මැතිවරණ ක්‍රමයේ ඇති සංකීර්ණ බව හෙළි කරන්නක් බව කැෆේ සංවිධානය පවසයි.

වසර 17කට පෙර කොටහේනේදී ඇල්ලූ ලොරියේ තවත් පුපුරන ද්‍රව්‍ය කිලෝ 100ක්

කොළඹ බෝම්බ පුපුරුවා මහා විනාශයක් කිරීමේ අරමුණින් ටී.එන්.ටී. වර්ගයේ අධි බලැති පුපුරන ද්‍රව්‍ය ‍කිලෝ 750ක් සමඟ මෙයට වසර 17කට පෙර අත්අඩංගුවට ගත් ලොරි රථයේ තිබී තවත් එම වර්ගයේම පුපුරන ද්‍රව්‍ය කිලෝ 100ක් සොයා ගැනීමට පොලිසිය පෙරේදා (12) සමත් විය.

1996 පෙබරවාරි 12වැනිදා කොටහේන ප්‍රදේශයේදී කොටි සැකකරුවන් තිදෙනකුද සමඟ අත්අඩංගුවට ගත් මෙම ලොරිය සියලු ආරක්ෂක අංශවල පරීක්ෂාවෙන් අනතුරුව කොළඹ 14 කොටහේන සාම විහාර භූමියේ නවතා තිබී ඇත.මෙම ලොරිය වසර 17ක් තිස්සේ එම ස්ථානයේ දිරාපත්වෙමින් තිබූ අතර නඩු විභාගවලින් පසු අධිකරණ නියෝග මත පෙරේදා එම ලොරිය බර ඉසිලීමේ යන්ත්‍රයක් යොදා ඉවත් කිරීමට කටයුතු කෙරිණි.

එම ඉවත් කිරීම් සිදු කරන අවස්ථාවේ දිරාපත් වූ ලොරියේ කැබලි කඩා වැටී ඇති අතර ඒ සමඟ එතුළ තිබී තවත් ටී.එන්.ටී. වර්ගයේ අධිබලැති පුපුරන ද්‍රව්‍ය කිලෝ 100ක් අඩංගු පෙට්ටි 8ක් තිබූ බව පොලිසිය පවසයි.1996 සොයාගත් පුපුරන ද්‍රව්‍ය කිලෝ 750 සොයා ගත්තේ ලොරියේ චැසිය තුළ අසුරා තිබියදීය. මෙම පුපුරන ද්‍රව්‍ය තොගය ලොරියේ චැසියට යාබදව සවිකැර තිබෙන යකඩ පෙට්ටියක අසුරා තිබී ඇති බව අනාවරණය වී තිබේ.

දළ දේශීය නිෂ්පාදිතයේ සියයට 6.8 ක වර්ධනයක්

2012 දෙවැනි කාර්තුවට සාපේක්ෂව 2013 දෙවැනි කාර්තුවේ ශ්‍රී ලංකාවේ දළ දේශීය නිෂ්පාදිතයේ වර්ධනය (ආර්ථික වර්ධනය) සියයට 6.8 ක් බව ජනලේඛන හා සංඛ්‍යාලේඛන දෙපාර්තමේන්තුව නිවේදනය කරයි.ආර්ථිකයේ ප්‍රධාන අංශ තුන වන කර්මාන්ත, සේවා හා කෘෂිකර්ම අංශවල පිළිවෙළින් සියයට 10.1, සියයට 6.6 ක වර්ධනයක් හා සියයට 1.1 ක පසුබෑමක් වාර්තා වී ඇත.ඉහත අංශ තුන අතරින් දළ ජාතික නිෂ්පාදිතයට ඉහළම දායකත්වය ලැබී ඇත්තේ සේවා අංශයෙනි. එය සියයට 59.1 කි. කර්මාන්ත අංශවල දායකත්වය පිළිවෙළින් සියයට 30.2 ක් හා 10.7 ක් වේ.

ප්‍රධාන අංශවල උප අංශ අතරින් පතල් හා කැණීම් අංශය සියයට 12.6 ක ද, විදුලිය, ගෑස් හා ජලය අංශ සියයට 16.2 ක් ද, ඉදිකිරීම් සියයට 17.8 ක් ද හෝටල් හා ආපනශාලා සියයට 21.1 ක් ද, ප්‍රවාහන සහ සන්නිවේදනය සියයට 9.5 ක් ද, බැංකු, රක්ෂණ හා නිශ්චල දේපළ සියයට 6.3 ක් ලෙස ඉහළ වර්ධනයක් පෙන්නුම් කරන බව ද එම නිවේදනයේ දැක්වේ.

ආර්ථිකයේ සියලු භාණ්ඩ හා සේවාවල සාමාන්‍ය මිල මට්ටම නිරූපණය කරන දර්ශකය 2002 දී ඒකක 100ක් ලෙස ගත් විට 2012 දෙවැනි කාර්තුවේ දී ඒකක 239.7 වූ අතර, එය 2013 දෙවැනි කාර්තුවේදී ඒකක 255.5 ක් දක්වා ඉහළ ගොස් ඇත.ඒ අනුව සියලුම පාරිභෝජන, අතරමැදි හා ආයෝජන භාණ්ඩවල සමස්ත උද්ධමන අනුපාතය සියයට 6.6 ක් වන බව දෙපාර්තමේන්තුව නිවේදනය කරයි.

දිල්ලි නුවර සමුහ දුෂකයන්ට මරණ දඩුවම

දිල්ලි නුවර දී බස් රථයක් තුළ තරුණියක සමුහ දූෂණය කර මරා දැමූ බවට වරද කරුවන් වූ හතර දෙනාටම ඉන්දීය අධිකරණයක් විසින් මරණීය දඩුවම නියම කෙරිණ.

මරණ දඬුවම ප්‍රකාශයට පත් කරද්දී චුදිතයකු අධිකරණය තුළ හඬා වැලපෙනු දක්නට ලැබිණ.නගරය වටා බස් රථය ධාවනය වෙමින් තිබිය දී ඔවුන් විසින් වරින් වර විසි තුන් හැවිරිදි ශිෂ්‍යාව දූෂණය කළ අතර පසුව ඇය මහා මග දමා යන ලදී.පසුගිය දෙසැම්බර් මාසයේ දී විසි තුන් හැවිරිදි එම ශිෂ්‍යාව දූෂණය කොට මරා දැමීමේ සිද්ධියෙන් පසු ඉන්දියාව පුරා ප්‍රචණ්ඩකාරී උද්ඝෝෂණ හට ගැනින.

නඩු තීන්දුව ප්‍රකාශයට පත් කරමින් වින්ශ්චයකාරවරයා පැවසුවේ මේ සිද්ධිය මගින් ඉන්දීය ඉන්දියාවේ පොදු ජන හෘදය සාක්ෂිය කම්පාවට පත් කොට ඇති බවයි.

පුද්ගලයන් ඔස්ට්‍රේලියා පැටවූ මහ මොළකරු කොටු වෙයි

ජාවාරම්කරු කෝටිපති ව්‍යාපාරිකයෙක්

මුහුදු මාර්ගයෙන් ඔස්ට්‍රේලියාවට පුද්ගලයන් යවන මිනිස් ජාවාරමේ මහ මොළකරු වූ කෝටිපති ව්‍යාපාරිකයකු කිරිබත්ගොඩ නගරයේ දී මාතර කොට්ඨාස අපරාධ විමර්ශන අංශය පෙරේදා (11) අත්අඩංගුවට ගෙන ඇත. මෙසේ අත්අඩංගුවට ගත්තේ ත්‍රිකුණාමලය චීන වරායේ පදිංචි 62 හැවිරිදි සුපිරි ගණයේ කෝටිපති ව්‍යාපාරිකයෙකි. මීට පෙර මේ ජාවාරමට අත්අඩංගුවට ගෙන රක්ෂිත බන්ධනාගාර ගත කර ඇති සැකකරුවන්ගෙන් හෙළි වූ තොරතුරු මත මාතර කොට්ඨාස අපරාධ විමර්ශන අංශයේ ස්ථානාධිපති ප්‍රධාන පොලිස් පරීක්ෂක ධම්මික හපුගොඩ මහතා ඇතුළු පොලිස් නිලධාරීන් මාස 2ක් පුරා සැකකරු අත්අඩංගුවට ගැනීමට ඔහු පසුපස හඹා ගාස් තිබේ. 

ඔහු වෙස් මාරු කරමින් දිනපතා පදිංචි ස්ථාන ‍මාරු කරමින් දුරකථන සිම් කාඩ්පත් දෛනිකව වෙනස් කරමින් පොලිසියෙන් සැඟවීමට උත්සාහගෙන ඇත.මොහු ත්‍රිකුණාමලය, කුරුණෑගල සහ වෙනත් ප්‍රදේශවල කෝටි ගණන් වටිනා නිවාස මිලදී ගෙන ඇති අතර ජාවාරමට බෝට්ටු සපයමින් තැරැව්කරුවන් යොදමින් මේ මිනිස් ජාවාරම මෙහෙය වූ ප්‍රධාන මෙහෙයුම්කරු වශයෙන් කටයුතු කර ඇත.

හොරෙන් ඕස්ට්‍රේලියාවට මිනිසුන් පිටත් කිරීමේ ජාවාරමේ ප්‍රධාන දම්වැලේ පුරුක් වශයෙන් මේ වන විට 26 දෙනෙකු රක්ෂිත බන්ධනාගාර ගත කර ඇති අතර ඒ පිරිස අතර නාවික හමුදාවේ ලෙප්ටිනන් කමන්ඩර්වරයෙක් නාවික හමුදාවේ සංඥා පණිවිඩ මධ්‍යස්ථානයේ තිදෙනෙක් සහ නාවික හමුදාවේ බුද්ධි අංශ නිලධාරියෙක් වශයෙන් නාවික හමුදාවට සම්බන්ධ පස් දෙනෙක් මේ වන විට රක්ෂිත බන්ධනාගාරගත කර ඇත. සැකකරු ඊයේ (12) මාතර මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි.

ක්‍රිකට්‌ සම්මාන විහිළුවෙන් ඇස්‌ රතුවෙයි

ක්‍රිකට්‌ ආයතනය විසින්ම සංවිධානය කරන ලද සම්මාන උළෙලකදී එම පරිපාලනයටම විවේචන එල්ලවීම වත්මන් ක්‍රිකට්‌ ආයතනයේ ශක්‌තිය කොතෙක්‌ද යන්න තීරණය කිරීම සඳහා හොඳ මිනුම් දණ්‌ඩක්‌ වන බව ක්‍ෂේත්‍රයේ දැන් කතා බහට ලක්‌ව තිබේ.

ක්‍රිකට්‌ ක්‍රීඩකයන්ගේ දක්‍ෂතා අගය කිරීම වෙනුවෙන් ඉකුත්දා පැවැති ඩයලොග් සම්මාන රාත්‍රිය රසවත් කිරීම සඳහා යොදාගෙන තිබූ ඇතැම් විශේෂාංග වලින්ම එම ස්‌ථානයට පැමිණ සිටි ක්‍රිකට්‌ බලධාරීන්ට සහ ක්‍රීඩකයන්ට දමා ගැසීම ඉතාම කනගාටුදායක තත්ත්වයක විය.

අදාළ සම්මාන උළෙල ශ්‍රී ලංකා ක්‍රිකට්‌ ආයතනයේ පූර්ණ අනුදැනුම මත සංවිධානය කරනු ලැබූවක්‌ වන බැවින් ක්‍රිකට්‌ පාලකයන්ව විවේචනය කෙරෙන ආකාරයේ සියලුම විශේෂාංග වල පූර්ණ වගකීම ක්‍රිකට්‌ ආයතනය භාරගත යුතු වනු ඇත.ජිප්සීස්‌ සංගීත කණ්‌ඩායමේ නායක සුනිල් පෙරේරා ප්‍රමුඛ තවත් කලාකරුවන් පිරිසක්‌ මෙම ඩයලොග් සම්මාන රාත්‍රියේදී විශේෂාංග කීපයක්‌ ඉදිරිපත් කළ අතර එම විශේෂාංග හේතුවෙන් ක්‍රිකට්‌ ක්‍ෂේත්‍රයට සම්බන්ධ බොහෝ පිරිසකගේ ඇස්‌ රතුවිය.